Meryl Streep refuzoi të paraqitej në tapetin e kuq të “Oscar”-it, me një fustan të “Chanel”, duke zgjedhur një krijim fantastik të “Elie Saab”. Fustani ishte gati, i bërë pas trupit të saj, i menduar dhe i skicuar, për ta bërë të shkëlqente gjate ceremonisë së çmimeve “Oscar”.
Por Karl Lagerfeld akuzoi aktoren se ajo kishte kërkuar një çek, nga shtëpia e modës, për të veshur këtë fustan që kushtonte 100 mijë euro dhe që po i jepej falas:
“Është aktore gjeniale, por edhe dorështrënguar, apo jo”, ka qenë komenti i stilistit legjendar që rrëfen sesi Streep është tërhequr, në momentin e fundit, nga fustani i krijuar prej tij sepse për ta mbajtur veshur në mbrëmjen gala, ylli i holluvidit, siç pretendon ai, ka kërkuar një çek.
Nuk ka publicitet falas pra për asnjë atelier, por politika e “Chanel” e ndalon t`iu ofrohen para aktorëve apo modeleve , për t’i bindur të paraqiten me veshjet e saj.
“Pasi i dhuruam një fustan 100.000 eurosh, morëm vesh që duhet edhe ta paguanim për ta mbajtur në trup. Ne japim fustane, ne krijojmë fustane, por ne nuk paguajmë për fustanet, është shprehur i indinjuar Lagerfeld , për Women’s Wear Daily. Një artiste e madhe”, vazhdon ai, “por pa klas”.
Fituesja e çmimit Oscar nuk vonoi të përgjigjej. “I madhi Karl Lagerfeld, më ka përbaltur mua, stilistin tim, dhe atelierin e shkëlqyer që zgjodha. Ai gënjeu në nominimin tim të 20-të rekord dhe kjo bëhet për të më eklipsuar, në sytë e medias, të kolegeve të mi dhe të publikut. Çfarë shkruan revista janë të pavërteta”: – deklaroi aktorja.
