Të dashuruar apo jo, disa nga yjet e showbiz-it shqiptar kanë refuzuar të festojnë 14 shkurtin.
Ndonëse disa prej tyre kanë dalë me deklarata dashurie për partnerët, apo me dhuratat që kanë marrë dje, ekziston edhe një listë që e ka “braktisur” festën e dashurisë, teksa shprehen se ka shumë ditë të tjera për të dashuruar.
Rozana Radi, Gaz Paja, Fiori Dardha dhe Amarda Toska janë vetëm disa nga personazhet që ndonëse kanë një partner, nuk i kanë dhënë rëndësi “Shën Valentinit”, madje përkundrazi, refuzojnë shprehimisht ta celebrojnë këtë ditë.
Rozana Radi
Për dashurinë nuk mjafton vetëm një ditë dhe Rozana Radi është shumë dakord me këtë. Ajo thotë se Shën Valentini nuk ka ndonjë kuptim të veçantë për të dhe lidhjen e saj të dashurisë. Këngëtarja shprehet se, “Unë nuk festoj, nuk e kam festuar asnjëherë. Nuk i kam qejf këto datat kështu, unë as Vitin e Ri nuk e festoj, sepse punoj, këndoj. Nuk festoj asnjë festë. Jam që të kalosh mirë çdo ditë me njerëzit që do dhe kaq”. E pyetur nëse ka marrë ndonjë dhuratë ditën e djeshme, Rozana shprehet se as nuk ka bërë një dhuratë dhe as e pret një të tillë. “Kam disa data speciale që bëj dhurata, ditëlindje e përvjetorë”, tregoi ajo.
Fiori Dardha
Është duke organizuar ceremoninë e martesës dhe Fiori Dardha është në fund të përgatitjeve. Sigurisht, këtë ditë të rëndësishme të jetës së saj, prezantuesja e njohur thotë se e pret me emocion. Por ndërkohë, ku dhe si do ta festojë ajo Shën Valentinin? E pyetur nga “VIP Pages” e “GSH”, Fiori rrëfen: “Nuk e festoj Shën Valentinin. Në fakt, sonte kemi organizuar një darkë me një çift miqsh, por ishte rastësi sepse kur e planifikuam, nuk u kujtova që ishte festë. Sidoqoftë, nuk e festojmë, nuk bëj dhe nuk marr dhuratë. Festojmë përvjetorët”, ka thënë Fiori Dardha.
Amarda Toska
Për Amarda Toskën, ky Shën Valentin ka qenë tejet i veçantë. Dhe nuk po flasim vetëm për dashurinë e saj me Ermal Mamaqin. Prezantuesja e njohur ka organizuar një event dedikuar pikërisht dashurisë së çifteve. “Sot martova 50 çifte, së bashku me kryebashkiakun Erion Veliaj”, tregon Ami për “VIP Pages”, ndërsa thekson se e djeshmja ishte një ditë pune për të.
Gaz Paja
Është një nga aktorët më të suksesshëm të skenës shqiptare dhe një ndër meshkujt më të lakuar të ‘showbiz’. Por, pavarësisht kësaj, ende nuk kemi dijeni për vajzën që mund t’i ketë fituar zemrën. Po flasim për Gaz Pajën, i cili tregon se, rreshtohet në listën e atyre që nuk e festojnë 14 shkurtin. “Nuk festoj Shën Valentin”, tregon aktori, ndërsa i pyetur nëse ky vendim është për shkak se nuk ka të dashur, apo thjesht se nuk i pëlqen kjo festë, Paja përgjigjet: “Nuk e kam parë ndonjëherë si festë”. Më tej aktori tregon se këtë ditë po e kalon me shokët.
Burimi: Gazeta Shqiptare
