Ky mund të jetë viti i Ermal Metës. Këngëtari me prejardhje shqiptare, që po bën karrierë muzikore në Itali, konkurron për herë të dytë në festivalin prestigjioz, Sanremo.
Ermali madje konsiderohet si favorit këtë vit, pasi kënga e tij “Vietato Morire” me subjekt mosnënshtrimin ndaj dhunës, po pëlqehet shumë si nga fansat, ashtu edhe nga juria. 35-vjeçari tregon historinë e një djali që ka parë të ëmën të keqtrajtohej në familje dhe që sërish beson te dashuria si e vetmja rrugë për të rritur fëmijët.
Në finale shkojnë 16 këngëtarë, pretendentë për çmimin e madh të Festivalit të 67-të të Sanremos. Natën e së enjtes, Ermali u shpall fitues me këngën Cover Amara Terra Mia. Ai fitoi çmimin “Cover 2017” me “Amara terra mia” me motive arbëreshe të kantautorit të famshëm Domenico Mudugno.
“Amara terra mia”, shqip “Toka ime e hidhur” trajton temën e emigracionit, atdheun e largët dhe dëshirën për t’u kthyer sërish.
Këngëtari shqiptar zuri vendin e parë, mes këngëtarëve që garuan me këngët më të suksesshme ndër vite të muzikës italiane. Ermal Meta ka konkurruar edhe në vitin 2016 në këtë festival me këngën e suksesshme “Odio le favole”.
