… vera, si libër jete të josh me aromën dhe ngjyrën. Zhytesh brenda një gote pa e kuptuar duke kursyer me vetëdije edhe pikën e fundit. Vera si art të mëson të jesh sa vetmitar, po aq edhe pjesë e një grupi që flasin përmes avujsh të athët pasioni. Një pije magjike e cila ka qenë gjithmonë pjesë e eventeve më të mëdha historike, por edhe e tavolinave tona të përditshme. Fsheh shumë mistere në vetvete, pikërisht për këtë arsye është e vështirë ta dallojmë. Për ta njohur një verë të mirë duhet të kemi parasysh 5 detaje:
- ETIKETA
Gjithmonë përpara se të zgjedhim një verë, duhet të lexojmë etiketën që na jep një informacion në lidhje me vendin dhe prodhuesin e saj. Zona të ndryshme nxjerrin verëra të ndryshme të cilat sjellin shije dhe aroma të shumëllojshme duke përcjellë vlerat e rrushit dhe territorit ku kultivohet. Etiketa na dëshmon mbi përqindjen e alkolit, llojin e rrushit dhe temperaturën e shërbimit.
- ANALIZA VIZIVE
Me analizën vizive mund të përcaktojmë disa veti tek vera e servirur. Gota duhet të ketë sfond të bardhë, ku pija të duket më qartë. Kështu mund të fillojmë të ndajmë edhe ngjyrat. Në fillim shohim nëse vera ka substanca në pezulli (precipitim). Ky është një tregues i cili na thotë se vera është shumë e vjetër ose e mbushur e pafiltruar. Më pas “hetojmë” ngjyrën e cila na përcakton moshën e verës. Nëse kemi të bëjmë me një shishe të vjetër, (më shumë se 5-vjeçare), atëherë ngjyra është e portokallizuar ose e thënë ndryshe, ngjyrë tulle. Kur nuanca është shumë e kuqe, deri në tonalitetet e rubinit ose violë, atëherë kjo është një verë e re. Lotët e verës janë tregues i mirë i strukturës dhe përqindjes së alkolit. Sa më të shpeshtë të jenë, aq më e strukturuar dhe aq më shumë alkol përmban.
- NUHATJA
Me nuhatje dallohen shumë cilësi, pozitive ose negative qofshin ato. Tek një verë e preferueshme duhet të shquajmë aroma të mira. Ato duhet të jenë kryesisht të pëlqyeshme dhe jo shqetësuese. Preferenca jonë duhet të shkojë tek një pije që të përcjellë aroma frutash të ndryshme, karakteristike të varieteteve të rrushit apo vaniljes, kakaos dhe e kafesë në rastin kur ruhet në fuçi lisi. Gama është e gjerë, por e rëndësishme është që një verë e mirë të kapë majën e vlerave në nuhatje. Bëni kujdes, aromat negative janë ato të uthullimit, oksidimit, enëve të papastra etj.
- SHIJA
Kur pimë verë duhet të arrijmë të dallojmë shijen që na lë në aparatin shqisor. Në këtë rast kërkohet balancim në komponentët e vet për të dhënë më të arrirën. Taninat dhe aciditeti duhet të jenë në ekuilibrin e duhur për të lënë një përshtypje maksimale. Kripërat minerale që vijnë nga terreni ku është mbjellë vreshti, e zgjasin shijen e verës. Vëmendje! Një verë cilësore duhet ta rikthejë shijen pasi të jetë pirë. Nuk duhet të sfumohet ose të jetë e shpërlarë.
- VERDIKTI FINAL
Me “verdiktin final” nënkuptojmë vendimin e marrë pas 4 fazave të para. Në fund është e rëndësishme që vera të pëlqehet; shijet janë shumë personale. Sigurisht, në mënyrë absolute, një verë cilësore duhet t’i pëlqejë çdokujt, madje detyrimisht, pasi ajo ka të gjitha tiparet e mira që një verë mbart.
Flori Uka, Enolog & Sommelier
Nentor, 2015 “Icon”.
