Nata e Vitit të Ri ishte një nga dështimet më të mëdha të karrierës së saj! Por Mariah Carey theu heshtjen pas makthit të performancës së saj, duke thënë se ishte “e turpëruar” nga skandali që përjetoi live në “Times Square”, të Nju-Jorkut.
Në mediat amerikane, si CNN dhe Fox, u mbajtën debate nëse Carey e ka humbur vokalin e fuqishëm që e karakterizonte karrierën e saj muzikore.
Carey reagoi fillimisht në “Twitter”, duke iu thënë kritikëve se “jeta nuk shkon gjithmonë sipas planit”.
Këngëtarja fajësoi produksionin Dick Clark për incidentin gjatë performancës së saj mbrëmjen e së shtunës. “Gjithçka që mund të them është se Dick Clark ishte një person i mrekullueshëm dhe jam me shumë fat që punova me të, kur nisa biznesin e muzikës. Jam e mendimit se Dick Clark nuk do të lejonte asnjë artist që të kalonte përmes kësaj situate dhe do të ishte aq i tupëruar sa isha unë në atë moment”, tha Carey për “Entertainment Weekly”.
Por si dështoi Mariah?
Ishte momenti kur kënga e gabuar u luajt teksa ajo priste nisjen e koncertit në skenë dhe nuk dinte fjalët. “Nuk bëmë prova teknike për këtë këngë. Na mungojnë gjithashtu disa nga zërat e dytë, nëse ju në audiencë do këndonit, do ishte shumë mirë”, u shpreh Mariah kur po qëndronte në skenë.
Burimi: Daily Mail
