Viti i ri pritet që të sjellë ngrica dhe një mot jo shumë të dëshiruar prej nesh! I ftohti që përjetuam ditët e fundit të vitit, që sapo mbyllëm, do të na shoqërojë edhe përgjatë muajit janar. Edhe pse ditët e para të janarit sollën një rritje të lehtë të temperaturave, i ftohti siberian duket se do të qëndrojë gjatë.
Sinoptikanët kanë parashikuar reshje shiu dhe dëbore deri në mesjavë, ndërsa fundjava pritet të kulmojë me temperatura ekstreme, duke bërë që termometri të zbresë disa gradë nën zero, në të gjithë vendin.
Vendet e thella malore do të shënojnë temperatura deri në -14 gradë, ndërsa mendohet që edhe në kryeqytet termometri të shënoj -5 gradë.
Meteorologët thonë se ky mot ekstrem është si pasojë e rrymave ajrore të ardhura nga Siberia.
I tillë parashikohet të jetë moti deri në mes të janarit, ndaj ne ju sugjerojmë që të visheni trashë për të mundur temperaturat e ulëta!
