Edhe pak orë na ndajnë nga mbarimi i këtij viti por 2016-ta nuk po ndalet së marri aktorët më të dashur për ne. Një tjetër legjendë e Hollivudit është ndarë nga jeta të martën, aktorja amerikane, Carrie Fisher, ka ndërruar jetë në moshë 60-vjeçare.
Zëdhënësi i familjes së saj, Simon Halls, ka lëshuar një komunikatë për media duke treguar se ajo ka vdekur të martën.
“Me një pikëllim të madh, Billie Lourd konfirmon se nëna e tij e dashur, Carrie Fisher, ka ndërruar jetë në orën 8:55 këtë mëngjes”.
“Atë e donte bota dhe do të na mungojë shumë. E gjitha familja ju falënderon për mendimet dhe lutjet tuaja”, thuhet mes tjerash në komunikatë.
Edhe pse u duk se gjendja e saj po shkonte drejt përmirësimit, aktorja Carrie Fisher nuk i mbijetoi dot rëndimit të situatës shëndetësore që i dha ataku kardiak i përpara disa ditëve. Ataku në zemër e goditi në avion, kur aktorja po kthehej në Los Angeles për të kaluar festat me të afërmit e saj.
60-vjeçarja po kthehej nga Londra ku kishte promovuar librin e saj të fundit “ditari i princeshës” e ku kishte marrë pjesë edhe në xhirimet e serialit “Catastrophe”.
“Star Ëars” mbeti filmi më i rëndësishëm i Carrie Fisherit, që pati gjithashtu role edhe në prodhime të mëdha hollivudiane si “The Blues Brothers” dhe “Kur Harry takoi Sally-n”. Në muajin nëntor pushtoi faqet e revistave roze kur rrëfeu historinë e fshehtë të dashurisë me Harrison Ford, të cilën e ka përmendur dhe në librin e porsa publikuar.
Ishte një lidhje e shkurtër, por intensive ajo që pati me kolegun e takuar në shesh xhirimin e Luftës së Yjeve- asokohe një 33 vjeçar i martuar me dy femijë-, ndërsa Carrie vetë ishte vetëm 19 vjeç.
