Një aksident tragjik rrugor në Pakistan u ka marrë jetën të paktën 17 personave, ndërsa mbi 10 të tjerë kanë mbetur të plagosur, disa prej tyre në gjendje kritike. Ngjarja ndodhi në veri të vendit, në itinerarin që lidh rajonin Swat me qytetin e Peshawarit.
Sipas autoriteteve lokale, fillimisht një autobus pasagjerësh pësoi defekt mekanik dhe u detyrua të ndalonte në anë të rrugës. Pasagjerët zbritën nga mjeti dhe po prisnin pranë tij, ndërsa shoferi po përpiqej të gjente ndihmë.
Pak minuta më vonë, një kamion që po lëvizte në të njëjtën rrugë humbi kontrollin dhe u përplas me grupin e njerëzve të mbledhur pranë autobusit, duke shkaktuar panik dhe viktima të shumta.
Zyrtarët e emergjencës konfirmuan se në vendngjarje humbën jetën të paktën 17 persona, ndërsa të plagosurit u transportuan me urgjencë në spitalet më të afërta. Mjekët bëjnë të ditur se disa prej tyre ndodhen në gjendje të rëndë.
Autoritetet kanë nisur hetimet për të zbardhur shkaqet e aksidentit, ndërsa dyshohet se kamioni mund të ketë pësuar problem teknik ose shoferi të ketë humbur kontrollin për shkak të shpejtësisë.
Shumë prej pasagjerëve po udhëtonin drejt familjeve të tyre për të festuar Bajramin, një nga festat më të rëndësishme për besimtarët myslimanë.
