Një nga çështjet më të komentuara së fundmi në sektorin financiar amerikan ka marrë një zhvillim të fortë ligjor, pasi drejtuesja e JPMorgan Chase, Lorna Hajdini, ka ngritur një padi për shpifje ndaj ish-bankierit Chirayu Rana, duke e akuzuar atë për publikimin e pretendimeve të rreme dhe dëmtim të reputacionit të saj.
Sipas dokumenteve të depozituara në Gjykatën Supreme të Shtetit të New York-ut, Hajdini mohon në mënyrë kategorike akuzat e ngritura ndaj saj dhe pretendon se Rana ka zhvilluar një “fushatë të qëllimshme shpifjesh”, me synimin për ta dëmtuar profesionalisht dhe për të përfituar financiarisht.
Në padinë e saj thuhet se akuzat e ngritura nga ish-bankieri janë “plotësisht të pavërteta, dashakeqe dhe të fabrikuara”, ndërsa ajo kërkon mbrojtje ligjore për reputacionin e saj.
Ky zhvillim vjen vetëm pak javë pasi vetë Rana kishte ngritur një padi ndaj Hajdinit dhe JPMorgan, ku pretendonte se ishte droguar, detyruar në marrëdhënie seksuale pa pëlqim dhe se kishte përjetuar ofendime racore.
Megjithatë, sipas raportimeve, hetimi i brendshëm i zhvilluar nga JPMorgan Chase nuk gjeti prova që mbështesnin akuzat e tij. Banka bëri me dije se disa punonjës bashkëpunuan me hetimin, ndërsa vetë Rana thuhet se nuk mori pjesë dhe nuk paraqiti prova mbështetëse.
Një zëdhënës i JPMorgan deklaroi se institucioni “mbështet plotësisht Lorna Hajdinin dhe të drejtën e saj për të mbrojtur emrin dhe reputacionin e saj”.
Ndërkohë, avokatët e Hajdinit kanë ngritur edhe pretendime të tjera serioze, duke thënë se Rana kishte kërkuar fillimisht një marrëveshje financiare që kalonte vlerën e 20 milionë dollarëve, përpara se të largohej nga banka. Sipas raportimeve, ai kishte refuzuar edhe një ofertë prej 1 milion dollarësh nga JPMorgan para se çështja të bëhej publike.
Dokumentet e reja gjyqësore pretendojnë gjithashtu se Rana kishte ngritur akuza të ngjashme edhe në një vend të mëparshëm pune, megjithëse këto pretendime nuk janë konfirmuar në mënyrë të pavarur.
Një tjetër element që ka tërhequr vëmendje në mediat amerikane lidhet me pretendimet se Rana kishte mashtruar bankën për të përfituar leje mortore të paguar, duke deklaruar se babai i tij kishte ndërruar jetë, ndërkohë që rezulton të jetë gjallë.
Po ashtu, një nga akuzat kryesore të tij ishte se Hajdini e kishte kërcënuar me ulje bonusi nëse nuk pranonte kërkesat e saj. Por sipas dokumenteve të burimeve njerëzore të siguruara nga mediat amerikane, Hajdini nuk kishte autoritet mbi bonuset, promovimin apo kompensimin financiar të Rana-s, pasi të dy raportonin në struktura të ndryshme brenda bankës.
Çështja tashmë pritet të shndërrohet në një betejë të fortë ligjore dhe mediatike, duke tërhequr vëmendjen jo vetëm të Wall Street, por edhe të opinionit publik amerikan.
