Ndeshja mes AF Elbasani dhe KF Tirana, e planifikuar të zhvillohej në stadiumin Elbasan Arena, nisi me katër minuta vonesë për shkak të një situate të tensionuar që përfshiu tifozëritë e të dyja skuadrave.
Sipas raportimeve nga vendngjarja, një përplasje masive shpërtheu mes ultrasve, të cilët arritën të futen në fushën e lojës duke sulmuar njëri-tjetrin. Situata doli jashtë kontrollit për disa minuta, duke krijuar kaos dhe pasiguri në stadium. Për të vendosur rendin, u desh ndërhyrja e menjëhershme e forcave të policisë dhe njësive speciale, të cilat arritën të shpërndanin turmën dhe të rikthenin qetësinë relative.
Tensioni nuk ishte i papritur, pasi incidentet kishin nisur që jashtë ambienteve të stadiumit, ku tifozët ishin përplasur verbalish dhe fizikisht, përpara se situata të përshkallëzohej edhe brenda “Elbasan Arena”.
Pavarësisht këtyre zhvillimeve, ndeshja u zhvillua më pas normalisht, ndërsa për KF Tirana kjo sfidë mbetet jetike në garën për mbijetesë, pasi skuadra kryeqytetase synon të marrë të paktën një pikë në transfertë për të shmangur zonën e rrezikshme të “play-out”.
KF Tirana e cila ka 41 pikë dhe tre fitore radhazi, mban vendin e gjashtë (me pikë të barabarta me Bylisin) dhe e mbyll sezonin në transfertë kundër kryesuesve të AF Elbasanit, një ndeshje delikate edhe për historikun e sjelljes mes ultrasve. Duke qenë se bardheblutë kanë tre ekipe poshtë tyre, rrëzimi direkt në Kategorinë e Parë është shmangur, por tanimë kërkohet qoftë edhe një pikë për të shmangur zonën play-out. Në varësi të ndeshjeve të tjera, KF Tirana mund ta shmangë vendin e tetë (play-out) edhe me humbje.
