Kafeja, një nga pijet më të konsumuara në botë, përmban kafeinë që ndikon drejtpërdrejt në trupin e njeriut, duke rritur vigjilencën por edhe nivelin e kortizolit – hormoni i lidhur me reagimin ndaj stresit.
Sipas kërkimeve të fundit, konsumimi i kafesë mund të stimulojë sekretimin më të lartë të kortizolit në organizëm. Ky efekt është më i fortë sidomos në mëngjes, kur trupi në mënyrë natyrale ka një rritje të këtij hormoni. Kur kafeina kombinohet me këtë pik të mëngjesit, niveli i kortizolit mund të shkojë edhe më lart se normalja.
Ekspertët theksojnë se ndryshimet e vogla të kortizolit gjatë ditës janë normale, por rritja e tepruar dhe afatgjatë mund të lidhet me probleme shëndetësore. Përveç kësaj, kafeina mund të shkaktojë simptoma të ngjashme me stresin, si rrahje të shpejta zemre, nervozizëm, pagjumësi dhe shqetësime në stomak.
Për ata që duan të ulin konsumimin e kafesë, sugjerohet që filxhani i parë të shtyhet më vonë gjatë ditës, të vendoset një orar për ndalimin e kafeinës dhe të zëvendësohet gradualisht me pije alternative si çajra bimorë ose ujë. Një tjetër alternativë është kalimi te kafeja pa kafeinë.
Ekspertët këshillojnë gjithashtu mënyra natyrale për menaxhimin e stresit si aktiviteti fizik, gjumi i mjaftueshëm, meditimi, ushqimi i shëndetshëm dhe kalimi i kohës në natyrë.
