Djali i miliarderit indian Mukesh Ambani të martën ofroi të shpëtojë hipopotamët, pasardhës të atyre që u importuan në Kolumbi nga bosi i drogës Pablo Escobar, nga eutanazia. Anand Ambani tha se i kishte paraqitur një kërkesë zyrtare qeverisë kolumbiane për të ndaluar vrasjen e kafshëve, të cilat kanë shkaktuar kaos në lumenjtë e vendit të Amerikës së Jugut.
Anand Ambani ka kërkuar leje për të “transportuar” 80 kafshët “në mënyrë të sigurt” në Kopshtin Zoologjik Vantara, i cili ndodhet në shtetin perëndimor indian të Gujaratit.
Kopshti zoologjik e quan veten “një nga qendrat më të mëdha të shpëtimit, kujdesit dhe ruajtjes së jetës së egër në botë”. Ndër kafshë të tjera, ai tashmë strehon qindra elefantë, 50 arinj, 160 tigra, 200 luanë, 250 leopardë dhe 900 krokodilë, sipas Autoritetit Qendror Zoologjik të Indisë. Aktivistët e mbrojtjes së jetës së egër kanë ngritur vazhdimisht shqetësime në lidhje me fluksin masiv të kafshëve në kopshtin zoologjik, veçanërisht futjen e specieve të rrezikuara.
Në vitet 1980, në Kolumbi, Pablo Escobar solli një palë hipopotamë në kopshtin e tij personal zoologjik në pjesën veri-qendrore të vendit. Pas vdekjes së tij në vitin 1993 dhe sekuestrimit të aseteve të tij, gjitarët u lanë pa mbikëqyrje dhe filluan të shumohen. Disa prej tyre sulmojnë peshkatarët në lumin Magdalena, lumi më i madh i Kolumbisë.
Anand Ambani, djali i kryetarit të Reliance Industries, ka thënë se ka paraqitur një plan të detajuar për të siguruar një shtëpi të re për kafshët. Propozimi përfshin kapjen dhe transportimin e hipopotamëve, nën mbikëqyrjen e veterinerëve, dhe krijimin e “një habitati natyralist të projektuar posaçërisht” për gjitarët, sipas një njoftimi për shtyp.
“Vandara ka përvojën, infrastrukturën dhe vendosmërinë e nevojshme për të mbështetur këtë përpjekje, tërësisht në kushtet kolumbiane”, tha ai, duke shtuar: Këta hipopotamë “janë qenie të ndjeshme dhe nëse kemi aftësinë t’i shpëtojmë ata përmes një zgjidhjeje të sigurt dhe humane, kemi përgjegjësinë të përpiqemi”.
