Një ngjarje e pazakontë, por me përfundim fatlum, është regjistruar në Korçë, ku një e moshuar ka shpëtuar falë vëmendjes së fqinjëve të saj. Gjithçka ka nisur nga një detaj i vogël, por vendimtar: ankesa e një komshiu për lagështirë dhe pikim uji nga tavani i banesës.
Fillimisht, fqinjët kanë tentuar të kontaktojnë me të moshuarën, por mungesa e përgjigjes ka ngritur dyshime se diçka nuk shkonte. Duke parë situatën e pazakontë dhe faktin që ajo jetonte e vetme, ata kanë njoftuar menjëherë autoritetet. Në vendngjarje kanë mbërritur forcat e policisë dhe zjarrfikësit, të cilët kanë ndërhyrë për hapjen e derës së banesës.
Pas hyrjes në apartament, e moshuara është gjetur e shtrirë në ambientin e dushit, në pamundësi për të lëvizur. Sipas informacioneve paraprake, ajo vuante nga probleme të rënda shëndetësore, përfshirë sëmundje të kockave dhe sklerozë, çka e kishte bërë të pamundur ngritjen e saj. Dyshohet se kishte rreth dy ditë në këtë gjendje, pa mundur të kërkonte ndihmë.
Fqinjët kanë treguar se mungesa e kontaktit me të dhe uji që depërtonte në tavan kanë qenë sinjalet që i shtynë të veprojnë në kohë. Falë ndërhyrjes së shpejtë, e moshuara është transportuar në spitalin rajonal të Korçës, ku po merr ndihmën mjekësore të nevojshme.
Burime nga spitali bëjnë me dije se ajo ka pësuar dëmtime, por fatmirësisht ndodhet jashtë rrezikut për jetën, ndërsa rasti ka sjellë edhe njëherë në vëmendje rëndësinë e kujdesit dhe solidaritetit mes fqinjëve.
