Kim Kardashian po hap një kapitull të ri në karrierën e saj, duke hyrë në botën e Broadway-t dhe këtë herë jo për vëmendje, por për një kauzë që e konsideron personale.
Sipërmarrësja dhe aktivistja për reformën në drejtësi i është bashkuar ekipit të producentëve për adaptimin skenik të filmit “Frika e 13-të”. Vepra rrëfen historinë e vërtetë të Nick Yarris, një burrë që kaloi 22 vite në pritje të ekzekutimit, derisa provat e ADN-së vërtetuan pafajësinë e tij.
Kim ka theksuar se ky projekt lidhet ngushtë me angazhimin e saj shumëvjeçar për reformën e sistemit të drejtësisë penale.
“Gjatë dekadës së fundit, kjo ka qenë një mision thellësisht personal për mua. E kam parë nga afër se si sistemi mund të dështojë dhe jam e përkushtuar të luftoj për ata që nuk kanë zë,” u shpreh ajo.
Sipas saj, teatri ka një ndikim të veçantë në mënyrën se si publiku përjeton histori të tilla.
“Kur një histori e tillë përjetohet drejtpërdrejt, ajo të mbetet gjatë në mendje dhe të sfidon të shohësh njeriun pas statistikave,” shtoi Kardashian.
Produksioni pritet të jetë i nivelit të lartë, me emra të njohur si Adrien Brody dhe Tessa Thompson në kast, duke shënuar një debutim të rëndësishëm për Kim si producente në Broadway.
Ajo shpreson që ky projekt të nxisë një debat më të thellë mbi drejtësinë:
“Shpresa ime është që kjo vepër të hapë një bisedë reale mbi atë çfarë do të thotë drejtësia e vërtetë.”
Ky hap vjen pas eksperiencës së saj të fundit në aktrim me projektin “All’s Fair”, ku ka punuar përkrah emrave të mëdhenj si Glenn Close dhe Sarah Paulson. Kjo e fundit e ka vlerësuar Kardashian për energjinë dhe përkushtimin e saj, duke theksuar se ajo arrin të balancojë njëkohësisht studimet në drejtësi dhe biznesin e saj.
Nga librat juridikë te skena e Broadway-t, Kim Kardashian duket se po ndërton një nga fazat më ambicioze dhe të guximshme të karrierës së saj.
