Përshkallëzimi i konfliktit mes Hezbollahut dhe Izraelit po vijon të rëndojë situatën humanitare në Liban, teksa numri i viktimave ka arritur në nivele alarmante.
Sipas Ministrisë së Shëndetësisë në Liban, të paktën 1,530 persona kanë humbur jetën që nga 2 marsi, kur nisi faza e re e përplasjeve. Bilanci përfshin 102 gra, 130 fëmijë dhe 57 punonjës të personelit mjekësor, ndërsa 4,812 të tjerë janë plagosur vetëm gjatë pesë javëve të fundit të përshkallëzimit.
Ndërkohë, ushtria izraelite ka vijuar operacionet ushtarake në jug të vendit, duke goditur infrastrukturë kyçe. Sipas deklaratave zyrtare, një tjetër urë strategjike mbi lumin Litani është shkatërruar, me pretendimin se përdorej nga Hezbollah për kontrabandë armësh drejt jugut të Libanit. Sulmi është kryer të hënën, ndërsa autoritetet izraelite bëjnë me dije se në javët e fundit janë shkatërruar gjithsej shtatë ura dhe pika kalimi në këtë zonë.
Këto objekte konsiderohen pjesë e infrastrukturës civile dhe luajnë një rol kyç në lidhjen e jugut me pjesën tjetër të vendit. Burime të sigurisë në Liban konfirmojnë shkatërrimin e shtatë urave kryesore, duke theksuar se dëmet kanë kufizuar ndjeshëm qarkullimin dhe aksesin rrugor në jug.
Situata në terren mbetet e tensionuar, ndërsa komuniteti ndërkombëtar po shton thirrjet për uljen e tensioneve dhe mbrojtjen e civilëve në zonat e prekura nga luftimet.
