Njerëzit thonë se dashuria është e verbër, por një studim pohon se diferenca në moshë mund të përcaktojë në fakt jetëgjatësinë e marrëdhënies suaj.
Ideja e të dalësh me dikë dukshëm më të madh (ose më të ri) se ti ende ngre mjaft reagime.
Një shembull konkret: trazira që ka të bëjë me historinë e takimeve të Leonardo DiCaprio-s ose me Robert De Niron, i cili së fundmi u bë baba në moshën 79-vjeçare. Partnerja e De Niros, Tiffany Chen, është 45 vjeç, ndërsa DiCaprio, 48 vjeç, njihet se preferon të dalë me persona nën 25 vjeç. Kur presidenti 45-vjeçar francez Emmanuel Macron u zgjodh në vitin 2017, bota u trondit nga fakti se gruaja e tij, Brigitte Trogneux, ishte 25 vjet më e madhe se ai dhe tani është 70 vjeçe.
Në atë kohë, Macron kishte folur hapur për obsesionin ndërkombëtar me diferencën në moshë midis tij dhe partneres së tij.
“Nëse do të isha 20 vjet më i madh se gruaja ime, askush nuk do të mendonte për asnjë sekondë se nuk mund të ishim ligjërisht bashkë“, tha ai për Le Parisien.
“Është për shkak se ajo është 20 vjet më e madhe se unë, prandaj shumë njerëz thonë: ‘kjo marrëdhënie nuk mund të jetë e qëndrueshme, nuk mund të jetë e mundur’.”
Ndërsa gjithmonë ka përjashtime nga rregulli, hulumtimet kanë treguar se marrëdhëniet me diferenca të caktuara moshe kanë më shumë gjasa të përfundojnë në ndarje. Sipas një studimi të kryer nga Universiteti Emory në Atlanta, sa më e madhe të jetë diferenca në moshë, aq më të mëdha janë gjasat e ndarjes.
Pas analizimit të të dhënave nga 3,000 persona, studiuesit zbuluan se çiftet me një diferencë moshe prej pesë vitesh kanë 18% më shumë gjasa të divorcohen sesa njerëzit e të njëjtës moshë.
Kjo shkallë rritet në 39% për çiftet me një diferencë moshe prej 10 vitesh dhe në 95% për ato me një diferencë moshe prej dy dekadash . Për ato me një diferencë moshe prej 30 vitesh , gjasat e divorcit janë 172% më të larta se të bashkëmoshatarëve të tyre.
Pra, cila është një diferencë ideale në moshë?
Sa i përket diferencës “ideale” në moshë, ndryshe nga bindja popullore se çiftet duhet të kenë disa vite diferencë që një marrëdhënie të lulëzojë, studiuesit besojnë se është një vit. Në këtë rast, shanset për ndarje janë vetëm 3%, krahasuar me një çift të së njëjtës moshë ose një çift me shumë vite diferencë moshe.
“Mund të jetë thjesht se llojet e çifteve me këto karakteristika kanë më shumë gjasa të ndahen për arsye të tjera”, tha Hugo Mialon, një nga studiuesit e studimit.
I njëjti studim zbuloi se sa më gjatë që një çift ka qenë bashkë , aq më të ulëta janë shanset e tyre për divorc. Konkretisht, ata që kishin qenë bashkë për pesë vjet kishin 76% më pak gjasa të divorcoheshin.
