Përdorimi i antibiotikëve mbetet një nga armët më të rëndësishme në luftën kundër infeksioneve bakteriale, por ndikimi i tyre në organizëm mund të jetë më i gjatë sesa mendohej më parë. Sipas një studimi të fundit nga Universiteti i Upsalas në Suedi, këto barna nuk prekin vetëm bakteret e dëmshme, por ndikojnë edhe në ekuilibrin natyral të mikroorganizmave në zorrë.
Mikrobioma intestinale, e cila luan rol kyç në tretje dhe në sistemin imunitar, mund të pësojë ndryshime që zgjasin për vite të tëra pas përdorimit të antibiotikëve. Studiuesit zbuluan se në disa raste, efektet mund të vazhdojnë nga 4 deri në 8 vite, edhe pas një kure të vetme.
Hulumtimi, i publikuar në një revistë prestigjioze shkencore, analizoi të dhënat e rreth 15 mijë personave, duke krahasuar ata që kishin përdorur antibiotikë me ata që nuk kishin marrë trajtime të tilla. Rezultatet treguan se ndikimi ndryshon në varësi të llojit të antibiotikut.
Ndër barnat që lidhen me ndryshime më të theksuara në mikrobiomë përmenden klindamicina, fluorokinolonet dhe flucloxacilina. Në anën tjetër, penicilina V, një ndër më të përdorurat, rezulton të ketë efekte më të lehta dhe më afatshkurtra.
Studime të mëparshme kanë sugjeruar gjithashtu një lidhje mes përdorimit të shpeshtë të antibiotikëve dhe rritjes së rrezikut për probleme si diabeti i tipit 2 apo infeksionet gastrointestinale.
Megjithatë, ekspertët theksojnë se antibiotikët mbeten të domosdoshëm për trajtimin e infeksioneve serioze, por përdorimi i tyre duhet të bëhet gjithmonë me kujdes dhe vetëm me rekomandim mjekësor.
