Dokumente të publikuara së fundmi nga Departamenti Amerikan i Drejtësisë hedhin dritë mbi pretendime të reja lidhur me financierin e ndjerë Jeffrey Epstein. Sipas dosjeve të Byrosë Federale të Hetimeve (FBI), Epstein kishte rrëfyer se ishte babai i fëmijës së njërës prej viktimave të tij.
Shënimet e FBI-së, që datojnë nga janari i vitit 2020, përmbajnë dëshminë e një gruaje e cila pretendon se ishte abuzuar seksualisht nga Epstein për disa vite, duke filluar që nga mosha 16-vjeçare.
Sipas saj, gjatë një vizite në rezidencën luksoze të Epstein në Nju Jork, ai i kishte treguar një fotografi të një gruaje bjonde në plazh, duke e prezantuar si “nënën e fëmijës së tij”.
Gruaja tregoi se e kishte njohur financierin kur ishte një modele adoleshente në vitin 2005. Ajo kujton se në një nga dhomat e rezidencës së tij, Epstein i kishte treguar edhe një skulpturë të torsos që, sipas tij, ishte realizuar nga trupi i së njëjtës grua.
“Në dhomë ishte një skulpturë e torsos, si një kallëp. Epstein tha se ajo ishte bërë nga trupi i kësaj gruaje”, thuhet në shënimet e hetuesve.
Këto nuk janë pretendimet e para që sugjerojnë se Epstein mund të ketë pasur fëmijë. Së fundmi, gazeta britanike “The Times” raportoi për një tjetër viktimë që pretendon se kishte lindur një vajzë rreth vitit 2002, kur ishte vetëm 16 ose 17 vjeç.
Sipas dokumenteve, foshnja i ishte marrë nënës vetëm 10 minuta pas lindjes. Gruaja pretendon se procesi ishte mbikëqyrur nga Ghislaine Maxwell, ish-partnerja dhe bashkëpunëtorja e Epstein.
“Ajo lindi, e dëgjova të qante. Pashë kokën dhe trupin e vogël në duart e mjekut. Ghislaine tha se ishte e bukur. Ku është ajo tani?”, citohet të ketë shkruar viktima.
Në rrëfimin e saj, ajo shprehej gjithashtu se nuk dëshironte të lidhej përgjithmonë me Epstein, duke theksuar diferencën e madhe në moshë mes tyre.
Ndërkohë, sipas raportimeve të Daily Mail, ekzistojnë edhe dëshmi të tjera ku pretendohet se Epstein u kishte kërkuar disa grave të lindnin fëmijët e tij.
Publikimi i këtyre dokumenteve ka rikthyer sërish në vëmendje një nga skandalet më të mëdha që përfshiu financierin amerikan, ndërsa shumë pyetje rreth veprimeve dhe rrjetit të tij vazhdojnë të mbeten pa përgjigje.
