Trupi i udhëheqësit suprem të Iranit, Ali Khamenei, i cili u vra gjatë përshkallëzimit të tensioneve në Lindjen e Mesme, pritet të varroset në Mashhad, qytetin e tij të lindjes në verilindje të Iranit.
Sipas raportimeve nga burime zyrtare iraniane, ceremonia mortore do të zhvillohet në Mashhad, një nga qytetet më të shenjta të vendit dhe një qendër e rëndësishme fetare për botën shiite. Autoritetet kanë nisur përgatitjet për masa të rrepta sigurie, ndërsa pritet pjesëmarrje masive e qytetarëve dhe përfaqësuesve të lartë të establishmentit iranian.
Ngjarja që çoi në vrasjen e Khameneit ndodhi të shtunën në orët e para të mëngjesit, kur bombardime izraelite goditën kompleksin e udhëheqësit suprem në Teheran. Në momentin e sulmit, Khamenei raportohet se ishte në një takim me bashkëpunëtorë të ngushtë, çka e bëri sulmin veçanërisht fatal.
Sipas burimeve amerikane dhe izraelite, operacioni që çoi në eliminimin e tij ishte rezultat i një veprimi të përbashkët mes Shtetet e Bashkuara dhe Izraeli, duke përfaqësuar kulmin e një strategjie dy-mujore të ndërtuar nga administrata e Donald Trump. Strategjia, sipas të njëjtave burime, kishte kombinuar përpjekjet diplomatike me përgatitje intensive ushtarake.
Të premten, pas dështimit të kanaleve diplomatike, presidenti amerikan kishte dhënë dritën jeshile për ndërhyrje ushtarake, një vendim që tashmë po riformëson ekuilibrat politikë dhe të sigurisë në rajon, ndërsa reagimet ndërkombëtare pritet të intensifikohen në ditët në vijim.
