Gruaja e Ali Khameneit, Mansoureh Khojasteh Bagherzadeh, raportohet se ka humbur jetën disa ditë pas sulmit të koordinuar mes Shteteve të Bashkuara të Amerikës dhe Izraelit, që goditi objektiva strategjikë në Iran. Lajmi vjen në një moment tejet të ndjeshëm për vendin, pas zhvillimeve dramatike që kanë tronditur strukturat më të larta të pushtetit.
Ali Khamenei, ish-lideri Suprem i Iranit për dekada me radhë, u eliminua në fazat e para të operacionit izraelito-amerikan, duke shënuar një nga ngjarjet më të rënda politike dhe simbolike në historinë e Republikës Islamike. Sipas burimeve jozyrtare, Mansoureh Khojasteh Bagherzadeh ndodhej pranë tij në kompleksin rezidencial në Teheran në momentin e sulmit dhe kishte mbetur e plagosur rëndë.
79-vjeçarja, e lindur në Mashhad të Iranit, ndërroi jetë disa ditë më vonë si pasojë e plagëve të marra. Ajo njihej për profilin e saj të ulët publik dhe për faktin se kishte qëndruar larg vëmendjes mediatike gjatë gjithë viteve të pushtetit të bashkëshortit të saj. Megjithatë, ajo kishte lidhje të rëndësishme familjare, duke qenë motra e Hassan Khojaste Bagherzadeh, ish-zëvendësdrejtor i Transmetimit të Republikës Islamike të Iranit.
Deri më tani, autoritetet iraniane nuk kanë konfirmuar zyrtarisht lajmin, ndërsa informacionet që qarkullojnë mbeten të kufizuara. Nëse vërtetohen, këto zhvillime përbëjnë një goditje të rëndë politike dhe morale për elitën drejtuese iraniane, në një periudhë të tensionuar për stabilitetin e brendshëm dhe marrëdhëniet ndërkombëtare të vendit.
