New York City pritet të përballet me një nga periudhat më të gjata të të ftohtit ekstrem në dekada, teksa meteorologët paralajmërojnë se ngricat mund të zgjasin deri në fundjavën e ardhshme. Sipas ekspertëve të AccuWeather, temperaturat maksimale në qytet pritet të qëndrojnë në ose nën 32 gradë Fahrenheit për rreth 15 ditë rresht, duke e renditur këtë valë të ftohti ndër më të gjatat në më shumë se gjysmë shekulli.
Meteorologu Chad Merrill theksoi se nëse parashikimet realizohen, kjo do të ishte seria e dytë më e gjatë me temperatura kaq të ulëta në historinë moderne të qytetit. Hera e fundit kur Nju Jorku përjetoi një periudhë të ngjashme ishte në vitin 1961, ndërsa rekordi absolut mbetet ai i 16 ditëve radhazi me temperatura nën zero.
I ftohti i acartë po nxitet nga sisteme të fuqishme presioni të lartë mbi Groenlandë dhe SHBA-në perëndimore, të cilat po drejtojnë masa ajrore arktike drejt bregut lindor. Kjo situatë meteorologjike ka sjellë stuhi të fuqishme bore dhe erëra therëse, duke përkeqësuar ndjeshëm kushtet e jetesës në qytet.
Parashikimet tregojnë se ndryshimi i motit mund të nisë nga fundi i fundjavës së ardhshme, kur temperaturat pritet të ngjiten gradualisht mbi zero. Deri atëherë, banorët e “Mollës së Madhe” do të duhet të përballen me ditë me temperatura në mesin e 20-ave dhe netë me shifra njëshifrore, ndërsa autoritetet vijojnë thirrjet për kujdes maksimal ndaj të ftohtit ekstrem.
