Një ngjarje e rëndë ka tronditur komunitetin shqiptar në Britaninë e Madhe, pasi 22-vjeçari nga Kosova, Lorik Abazi, humbi jetën pas një sulmi me thikë në Londër. I riu ishte nipi i këngëtares së njohur shqiptare Ganimete Abazi, e njohur me emrin artistik Ganja.
Sipas BBC, ngjarja ndodhi të dielën në zonën e Croydon. Lorik Abazi u qëllua me thikë gjatë një përleshjeje dhe si pasojë e plagëve të marra ndërroi jetë. Rrethanat e sakta të ngjarjes nuk janë bërë ende të ditura, ndërsa hetimet vijojnë.
Policia britanike arrestoi dy vajza 25 vjeçare dhe një djalë 28 vjeçar si të dyshuar për vrasjen. Njëra prej vajzave u lirua më pas me kusht. Sipas BBC, dy të rinj të tjerë 21 vjeç u gjetën me plagë të shkaktuara nga mjete prerëse dhe u arrestuan nën dyshimin për përfshirje në përleshje. Njëri prej tyre ka lëndime që mund të jenë kërcënuese për jetën dhe ndodhet në spital, ndërsa tjetri është marrë në paraburgim pasi është liruar nga spitali.
Autoritetet u kanë bërë thirrje qytetarëve që kushdo që ka informacion, pamje apo filmime që mund të ndihmojnë hetimin, t’i paraqesë ato pranë policisë.
Lajmi i ndarjes nga jeta të 22-vjeçarit ka sjellë reagime të shumta nga familjarë dhe të afërm. Në një postim në rrjetet sociale, familja e Lorikut shkruan: “Loriku ishte një i ri i kujdesshëm, i zgjuar dhe me një sens të mirë humori, me gjithë të ardhmen përpara. Ne, prindërit e tij, vëllai, e dashura, gjyshërit dhe familja e gjerë si dhe miqtë, e donim shumë. Një dritë është shuar në jetët tona dhe jemi të shkatërruar përtej fjalëve nga humbja e tij. Ju lutemi me mirësi të respektoni privatësinë tonë në këtë kohë.”
Edhe këngëtarja Ganimete Abazi reagoi përmes një mesazhi prekës në Instagram, ku shprehu dhimbjen për humbjen e nipit të saj: “Ahhh bre sa e vështirë me ta thënë lamtumirë, Loriku ynë. Jeta shpeshherë është e padrejtë dhe godet aty ku dhemb më së shumti. Pusho në paqe, nipi jem, shpirti jem. Ne do të jetojmë me dhimbjen për ty, me kujtimet dhe dashurinë që na dhe.”
Hetimet për zbardhjen e plotë të ngjarjes vazhdojnë, ndërsa familja dhe të afërmit e Lorik Abazit përballen me një humbje të parakohshme dhe të dhimbshme.
