Mbingarkesa e krijuar gjatë sezonit veror nga turizmi masiv në ishullin italian të Kapri ka detyruar autoritetet lokale të miratojnë rregulla të reja dhe kufizime më të rrepta për vizitorët.
Ishulli, që ka rreth 13 mijë banorë, përballet çdo verë me deri në 50 mijë vizitorë në ditë. Ky fluks i madh krijon probleme në porte, në rrugët e ngushta dhe në atraksionet kryesore turistike.
Sipas agjencisë italiane të lajmeve ANSA, duke nisur nga sezoni i ardhshëm veror do të lejohen të zbresin në ishull vetëm grupe të organizuara me maksimum 40 persona. Vendimi është miratuar njëzëri nga këshilli bashkiak.
Rregullorja e re parashikon:
-Guidat e grupeve me mbi 20 persona nuk do të lejohen të përdorin altoparlantë gjatë tureve në qytetin kryesor.
-Në vend të tyre do të përdoren kufje me radio, për të reduktuar zhurmën dhe shqetësimet për banorët dhe vizitorët e tjerë.
-Drejtuesit e grupeve do të identifikohen me bexha në qafë.
-Nuk do të lejohen mjete të dukshme sinjalizuese, si çadra apo flamuj mbi shkopinj.
Guidat do të jenë të detyruara të mbajnë grupet të bashkuara dhe të shmangin bllokimin e rrugëve dhe shesheve.
E vendosur në Gjiri i Napolit, Kapri njihet për vilat me mure të bardha, bregdetin shkëmbor dhe atraksione të famshme si Grotta Azzurra. Megjithatë, gjatë sezonit të pikut, portet, zonat panoramike dhe monumentet historike të ishullit mbingarkohen rregullisht, duke nxitur nevojën për masa më të forta menaxhimi.
