Klubi i Futbollit Tirana është tronditur nga një humbje tragjike. Vajza e futbollistit Freddy Alvarez ka ndërruar jetë në orët e para të mëngjesit të sotëm në kryeqytet, duke lënë familjen dhe bashkëpunëtorët e lojtarit në një moment të vështirë dhe të dhimbshëm.
Në një komunikatë zyrtare, KF Tirana shpreh dhimbjen e thellë dhe solidaritetin me mesfushorin nga Costa Rica dhe familjen e tij:
“Me dhimbje të thellë ndajmë lajmin se vajza e lojtarit tonë, Freddy Alvarez, ka ndërruar jetë tragjikisht në orët e para të mëngjesit të sotëm në Tiranë. I gjithë klubi ynë është i tronditur dhe në zi, duke qëndruar pranë Freddyt dhe familjes së tij në këtë moment të rëndë. Ngushëllimet tona më të sinqerta janë me familjen Alvarez. U prehtë në paqe.”
KF Tirana njofton gjithashtu se nuk ka ende informacione mbi shkaqet e ngjarjes tragjike. Humbja ka tronditur komunitetin bardheblu, teksa klubi përpiqet të mbështesë lojtarin dhe familjen në këto orë të vështira.
Sot, klubi ka programuar ndeshjen kundër Flamurtarit në orën 13:30, megjithatë nuk është e qartë nëse dueli do të zhvillohet sipas kalendarit, duke marrë parasysh situatën emocionale dhe tragjedinë që ka prekur skuadrën.
Freddy Alvarez, 30 vjeç, u bashkua me KF Tiranën gjatë merkatos së janarit dhe është aktivizuar për tre ndeshje, duke përfshirë takime në Superligë dhe Kupën e Shqipërisë. Klubi dhe tifozët bardheblu janë solidarizuar me lojtarin, duke i shprehur ngushëllimet më të sinqerta dhe duke qëndruar pranë tij dhe familjes në këtë moment dhimbjeje të madhe.
