Duka dhe Dukesha e Sussex-it, Meghan Markle dhe Princi Harry, kanӕ publikuar së fundmi kartolinën e Krishtlindjes, duke u shoqëruar me një foto familjare me dy fëmijët e tyre.
Në imazhin e shpërndarë në rrjetet sociale, Princi Archie shihet duke përqafuar të atin, ndërsa Meghan mban për dore vajzën e tyre, Princeshën Lilibet. Familja ndodhet mbi një urë të vogël prej druri, në një ambient natyror.
“Gëzuar festat! Nga familja jonë te e juaja”, shkruan Meghan në mesazhin shoqërues.
Përveç kartolinës, çifti ka publikuar edhe një video përmbledhëse të aktiviteteve bamirëse gjatë vitit, ku shfaqen edhe fëmijët e tyre, Archie 6-vjeç dhe Lilibet 4-vjeçe. Në pamje, familja shihet teksa përgatit biskota për Ditën e Falënderimeve në bashkëpunim me një organizatë lokale.
Videoja pasqyron punën e bërë përmes fondacionit Archewell, i cili së fundmi ka ndryshuar emrin në Archewell Philanthropies. Sipas njoftimit zyrtar, fondacioni u mundëson Harry-t dhe Meghan-it të zgjerojnë angazhimin e tyre filantropik global si familje.
Fondacioni Archewell u krijua në vitin 2020, pas tërheqjes së çiftit nga detyrat mbretërore dhe zhvendosjes së tyre në Shtetet e Bashkuara. Publikimi i kartolinës së Sussex-ëve vjen vetëm një ditë pasi Princi dhe Princesha e Uellsit, William dhe Catherine, ndanë portretin e tyre familjar për kartolinën e Krishtlindjes, ku shfaqen me fëmijët e tyre, Princin George, Princeshën Charlotte dhe Princin Louis.
Ndërkohë, më herët gjatë këtij muaji, Mbreti Charles III dhe Mbretëresha Camilla publikuan kartolinën e tyre festive, të realizuar në Romë, Itali.
