Një ngjarje e rëndë që tronditi opinionin publik më 25 nëntor ka marrë sot fundin më tragjik. Erion Boba, 15 vjeç, i cili mbeti i plagosur rëndë pas një konflikti mes bashkëmoshatarëve të tij në Durrës, ka ndërruar jetë pas disa ditësh luftë të pashpresë për jetën.
Pavarësisht përpjekjeve maksimale të mjekëve dhe faktit që adoleshenti tregoi forcë të jashtëzakonshme gjatë trajtimit, organizmi i tij nuk mundi t’u bëjë ballë plagëve të rënda që kishte marrë. Fillimisht, mjekët e nxorën nga intubimi të shtunën e kaluar, por gjendja e tij u përkeqësua menjëherë, duke detyruar riazhën në intubim dhe më pas transferimin urgjent në Tiranë, ku fatkeqësisht ndërroi jetë.
Erioni u godit me thikë në zemër dhe stomak gjatë një sherri me motive të vogla mes dy grupeve adoleshentësh, një konflikt që brenda pak sekondave u shndërrua në një ngjarje të përgjakshme. Autori i dyshuar i ngjarjes, një 14-vjeçar, është arrestuar dhe ndaj tij rëndon akuza për vrasje në tentativë, e cila pritet të riformulohet pas ndarjes nga jeta të të miturit.
Ngjarja ka risjellë në vëmendje debatet për sigurinë e fëmijëve dhe adoleshentëve në hapësirat publike dhe afër institucioneve arsimore. Rasti i Erion Bobës rikujton edhe tragjedinë e Martin Canit, i cili u vra në nëntor të vitit të kaluar pas një konflikti po aq të shpejtë dhe pa motive serioze, disa metra larg shkollës “Fan Noli”. Edhe atëherë, ngjarja ngriti pikëpyetje të forta mbi mungesën e kontrollit dhe masave mbrojtëse për të miturit, përfshirë mungesën e një oficeri sigurie në zonën ku ligjërisht duhej të ishte i pranishëm.
