Aktorja hollivudiane dhe personalitetja e njohur, Zsa Zsa Gabor, e cila u martua nëntë herë, ndërroi jetë në moshën 99-vjeçare.
Hungarezja, e cila emigroi në Shtetet e Bashkuara të Amerikës gjatë Luftës së Dytë Botërore, vuajti një atak në zemër dhe u nda nga jeta e rrethuar nga të dashurit e saj dhe miqtë në shtëpinë në Bel-Air, Los Angeles, të dielën.
Gabor u shfaq në më shumë se 70 filma, por ishte më shumë e njohur për martesat e saj me meshkuj të pasur, personalitetin e papërmbajtshëm dhe stilin e jetesës magjepsës.
Bashkëshorti i saj, Frederic von Anhalt, tha mes lotëve: “Të gjithë ishin atje. Ajo nuk vdiq e vetme”.
E famshmmja amerikane, e cila mbajti theksin e saj hungarez, kishte një sërë problemesh shëndetësore që pasi u përfshi në një aksident me makinë në 2002-shin, nga i cili mbeti pjesërisht e paralizuar.
Shumë personalitete të njohur të ekranit shprehën ngushëllimet e tyre në rrjetet sociale, ndërsa kujtonin shprehjet që na la në kujtesë aktorja.
Aktorja e cila ka luajtur te “Moulin Rouge”, njihet për shprehjen e saj: “Jam një amvisë e mrekullueshme. Çdo herë që lë një mashkull, mbaj shtëpinë e tij”.
Ajo luajti në filma të njohur si, “The Girl in the Kremlin” dhe “Queen of Outer Space”. Aktorja u bë një seks-simbol i “Hollywood”-it edhe falë komenteve të saj të sinqerta për jetën e saj të gjallë të dashurisë.
“Meshkujt gjithmonë më kanë pëlqyer dhe unë gjithmonë i kam pëlqyer meshkujt”, tha ajo për revistën “Life” në vitin 1951. Dhe kur e pyesnin “Sa bashkëshortë ke pasur”, ajo përgjigjej: “Do të thuash përveç të mive?”.
Martesa e parë e Gabor ishte me diplomatin turk, Burhan Asaf Belge në 1937-n dhe u divorcuan në 1941. Ndërsa në 1942-shin u martua me Conrad Hilton, biznesmenin e hoteleve dhe stër-stërgjyshin e të famshmes Paris Hilton. Ata qëndruan të martuar për 5 vite dhe lindën një vajzë, Francesca, fëmija e vetme e Gabor, e cila ndërroi jetë në 2015-n, në moshën 67-vjeçare.
9 martesat e Zsa Zsa Gabor:
Burhan Asaf Belge (1937–1941)
Conrad Hilton (prill 10, 1942 – 1947, me të cilin pati fëmijën e vetme, Francesca)
George Sanders (2 prill 1949 – 2 prill 1954)
Herbert Hutner (5 nëntor 1962 – 3 mars 1966)
Joshua S. Cosden, Jr. (mars 1966 – tetor 1967)
Jack Ryan (janar 1975 – gusht 1976)
Michael O’Hara (gusht 1976 – 1983)
Felipe de Alba (prill 13–14, 1983, por martesa u anulua, për shkak se nuk ishte kryer ende divoci me ish-bashkëshortin e saj)
Frederic Prinz von Anhalt (gusht 1986 – deri në vdekje)
Burimi: Daily Mail
