Blac Chyna i dha fund. Modelja 28-vjeçare përdori rrjetet sociale për të thënë versionin e saj të historisë, disa minuta pasi Rob Kardashian u tha ndjekësve të tij në “Snapchat”, se ajo ishte larguar nga shtëpia bashkë me fëmijën e tyre Dream.
Rob publikoi një seri videosh në rrjete sociale ku i shkatërruar, zbulon pabesinë e të dashurës së tij. “Vij në shtëpi dhe shoh që Chyna ka marrë fëmijën, të gjithë dhomën e vajzës që ndërtuam bashkë. Dhe ka ikur. Më la vetëm dhe ka ikur”, shprehet Rob mes lotësh. “Jam kaq i pikëlluar dhe i mërzitur, sepse po afrohen Krishtlindjet dhe unë dua të jem me vajzën time”, vazhdon ai.
Pas kësaj Blac Chyna reagoi me anë të një mesazhi ku sqaroi të gjithë situatën, nga këndvështrimi i saj.
“Mori fund! Gjatë gjithë këtij viti, nuk kam bërë asgjë tjetër veçse kam ndihmuar Rob! Është shumë e trishtushme dhe patetike sa poshtë ka rënë për të justifikuar problemet që ka me veten! Nuk kam bërë asgjë përveçse e kam ndihmuar dhe e kam dashur atë nga fillimi. Rob mu lut për të pasur Dream! Ai më stresoi gjatë gjithë shtatzënisë sime! Duke më akuzuar për tradhti, duke më çmendur me mesazhe dhe më pas duke më mbuluar me dhurata! Po abuzohesha verbalisht çdo ditë, isha sërish atje me asgjë, por me shpresë për ne!”, shkroi ndër të tjera Chyna.
Ajo shtoi se ka bërë shumë sakrifica për të, duke duruar edhe tradhtitë e tij, gjë që ajo nuk e ka bërë kurrë. Lajmi shokues i ndarjes vjen pasi llogaria e telefonit të Blac Chyna-s është vjedhur gjatë së dielës dhe disa biseda që mendohet të jenë mes saj dhe shoqes së ngushtë apo avokatit, janë publikuar në internet. Situata mes të dyve është nxehur edhe më shumë pas tentativave të Chyna-s për të ndërruar mbiemrin në Kardashian, gjë që është ndaluar kategorikisht nga pjesa tjetër e familjes, të cilat ishin të gatshme ta vazhdonin betejën në gjyq.
Në një bisedë me një shoqen e saj, Chyna i referohet Rob si ‘i shëndoshë, përtac dhe i pasigurt’, ndërsa shton se i jep një vit kohë për të mbledhur veten ose do të largohet. “Vetëm ruaj paratë e tua”, i përgjigjet shoqja në mesazhet e publikuara.
Burimi: E!Online/ Daily Mail
