Dhimbjet e kokës mbeten një nga shqetësimet më të përhapura të përditshmërisë, duke prekur njerëz të çdo moshe. Ndërsa shkaqet mund të jenë të ndryshme, nga stresi, lodhja, tek faktorët hormonalë, ekspertët theksojnë se edhe ushqimi luan një rol më të rëndësishëm seç mendohet në menaxhimin dhe parandalimin e tyre.
Sipas dietologëve, hidratimi është pika e parë ku duhet të nisë kujdesi. Edhe një nivel i lehtë dehidratimi mund të shkaktojë dhimbje koke, ndaj uji mbetet “ilaçi” më i thjeshtë dhe më i shpejtë. Përveç tij, frutat me përmbajtje të lartë uji, si shalqiri, kastravecat dhe madje edhe luleshtrydhet, i ndihmojnë qelizat të ruajnë ekuilibrin e lëngjeve dhe të reduktojnë simptomat.
Një tjetër grup i rëndësishëm ushqimesh janë peshqit yndyrorë si salmoni dhe sardelja. Acidet omega-3 që gjenden tek këta peshq njihen për efektet anti-inflamatore dhe ndikimin pozitiv në qarkullimin e gjakut, duke ndihmuar në uljen e intensitetit të dhimbjeve të kokës.
Në listë shtohen edhe perimet me gjethe jeshile, sidomos spinaqi, falë përmbajtjes së lartë të magnezit, një mineral që shpesh mungon tek personat që vuajnë nga migrena. Edhe arrat dhe bajamet, të pasura me magnez dhe vitaminë E, mund të ofrojnë lehtësim natyral.
Pijet bimore si çaji me xhenxhefil apo kamomil rekomandohen gjithashtu për efektet qetësuese dhe anti-inflamatore.
Specialistët këshillojnë që këto ushqime të integrohen rregullisht në dietë, pasi ndikimi i tyre mund të jetë i ndjeshëm në uljen e shpeshtësisë së dhimbjeve. Megjithatë, për dhimbje të vazhdueshme ose të forta, rekomandohet konsultë me mjekun.
