Dy ortekë të fuqishëm në Nepal kanë përfshirë ekspedita alpinistësh italianë, gjermanë dhe francez, duke shkaktuar nëntë viktima dhe duke lënë pesë të mbijetuar, të cilët u dërguan me helikopter në Katmandu.
Ngjarja e parë ndodhi në majën Panbari Himal (6,887 metra), ku Stefano Farronato dhe Alessandro Caputo, të shoqëruar nga Valter Perlino, përpiqeshin të ngjiteshin. Perlino mbijetoi dhe dha alarmin. Një grup tjetër italianësh u godit nga orteku në Yalung Ri, ku humbën jetën tre shtetas italianë: Paolo Cocco (41 vjeç), Marco Di Marcello (37 vjeç) dhe Markus Kirchler (30 vjeç).
Përveç tyre, jetën e humbën edhe Jakob Schreiber nga Gjermania, Christian Andre Manfredi nga Franca dhe dy udhërrëfyes nepalezë, Padam Tamang dhe Mere Karki. Vetëm tre nepalezë dhe dy francezë mbijetuan.
Pas tragjedisë janë ngritur kritika të forta për vonesat në shpëtim. Një Sherpa i plagosur raportoi se priti mbi 24 orë për evakuimin, ndërsa autoritetet raportojnë se procedurat burokratike për lejet e fluturimit me helikopter, të kërkuara nga Ministritë e Turizmit, Brendshme dhe Mbrojtjes, si dhe Autoriteti i Aviacionit Civil , shkaktuan vonesën.
“Orteku ra në orën 9 të mëngjesit, por autorizimi për shpëtim u dha vetëm tetë orë më vonë,” tha udhërrëfyesi Pasang Kidar. Presidenti i Shoqatës së Alpinizmit të Nepalit, Phur Gyalje, kërkoi reforma urgjente në sistemin e reagimit ndaj emergjencave, duke theksuar se procedurat e shpejta janë jetike për shpëtimin e jetëve në male.
Kjo tragjedi ngre sërish pyetje mbi sigurinë dhe koordinimin e operacioneve në malet më të rrezikshme të botës.
