Raketa Starship e SpaceX ka përfunduar me sukses fluturimin e saj të 11-të testues më 13 tetor, duke shënuar një tjetër hap përpara drejt misionit ambicioz për të dërguar njerëz në Mars deri në vitin 2026.
Fluturimi u realizua nga baza Starbase në Teksas në orën 18:23 me orën lokale dhe zgjati një orë e gjashtë minuta, përpara se raketa të zbriste butë në Oqeanin Indian. Në një video të publikuar nga SpaceX në platformën X, Starship shihet duke kaluar përmes reve përpara se të bëjë një ulje spektakolare në ujë.
“Kemi konfirmim të zbritjes! Urime të gjithë ekipit të SpaceX për fluturimin e suksesshëm të Starship,” shkroi kompania.
Sipas SpaceX, ky ishte fluturimi i fundit për raketën e gjeneratës së dytë dhe booster-in Super Heavy të gjeneratës së parë. Gjatë testit, të gjitha objektivat kryesore u arritën, përfshirë një manovër të avancuar uljeje që do të përdoret në gjeneratën e ardhshme të raketave.
Në minutat e fundit, Starship kreu një manovër dinamike për të simuluar kthimin në Tokë në misionet e ardhshme, duke përdorur katër krahët e saj për të drejtuar uljen.
Ky sukses vjen pas shpërthimit të raketës gjatë testit të 10-të në qershor dhe problemeve në testin e nëntë, por SpaceX duket se po e kthen sërish kursin drejt së ardhmes.
Rruga për në Mars mbetet e gjatë, por çdo ulje e butë është një hap më afër.
