Ylli i Real Madridit, Kylian Mbappé, ka ndarë një rrëfim të sinqertë mbi presionin dhe mungesën e lirisë emocionale që përjetojnë futbollistët profesionistë. Në një intervistë, ai tregoi se sa e vështirë është për lojtarët të shprehin hapur lodhjen apo vështirësitë e tyre shpirtërore, për shkak të pritshmërive të larta të tifozëve dhe opinionit publik.
“Kur humb një ndeshje dhe thua se je i lodhur, njerëzit mendojnë se e thua thjesht sepse ke luajtur dobët. Me pagën që ke, tifozët presin që të jesh i lumtur çdo ditë,” tha futbollisti i njohur Mbappé, duke nënvizuar se perceptimi i jashtëm shpesh nuk përputhet me realitetin e jetës së futbollistëve.
Sipas tij, vetëm momentet e lavdisë i lejojnë lojtarët të flasin lirshëm për ndjenjat e tyre:
“E vetmja kohë kur mund të shprehesh hapur është pas fitoreve të mëdha, si kur fiton Kupën e Botës. Atëherë, për pak çaste, jemi të paprekshëm.”– tha ai.
Francezi shtoi se pasioni për futbollin është ajo që e mban ende të lidhur me lojën:
“Po të mos kisha këtë pasion, bota e futbollit do të më ishte neveritur shumë kohë më parë,” përfundoi ai, duke lene ne shok te gjithe ndjekesit e tij dhe fansat e futbollit.
