Një qen në qytetin Huaral të Perusë, shmangu një tragjedi kur arriti të shuante me dhëmbë një fitil dinamiti të hedhur në shtëpinë e familjes së tij.
Incidenti ndodhi në shtëpinë e gazetarit Carlos Mesías Zárate, i cili dyshon se sulmi lidhet me punën e tij hetimore. Sipas gazetës La Republica, kamerat e sigurisë regjistruan momentin kur qeni Manchis filloi të lehte me zë të lartë, duke ndjerë praninë e një të huaji jashtë shtëpisë.
Pamjet filmike tregojnë një burrë që ndez dhe hedh një eksploziv nga pjesa e sipërme e derës, ku kishte një dritare të thyer. Manchis vrapoi poshtë shkallëve, rrëmbeu dinamitin dhe e fiku fitilin e ndezur me dhëmbë.
Gazetari e gjeti eksplozivin në dyshemenë e korridorit dhe menjëherë telefonoi policinë, e cila e këshilloi të mos e prekte. Pasi shqyrtoi pamjet filmike, familja përcaktoi se autori i krimit kishte mbërritur në vendngjarje me taksi dhe më pas kishte ecur drejt shtëpisë për të hedhur dinamitin.
“E lanë në një cep, ai erdhi te dera ime, ndezi fitilin dhe e hodhi nga maja e derës. Futi dorën brenda, hodhi dinamitin dhe madje u përkul për të parë nëse po digjej ende”, tha gazetari.
Një njësi speciale policore për çaktivizimin e bombave mbërriti në vendngjarje, hoqi dinamitin dhe po heton. Mesias dhe familja e tij kanë kërkuar mbrojtje. Manchis është në gjendje të mirë shëndetësore dhe padyshim që po shpërblehet për aktin e saj heroik.
