Shtatë persona humbën jetën kur një aeroplan ushtarak u rrëzua ndërsa fluturonte drejt një komuniteti indigjen në rajonin e Amazonës, njoftoi Ministria e Mbrojtjes e Venezuelës.
Tre nga pasagjerët e aeroplanit u nxorën të gjallë nga rrënojat.
Aeroplani Cessna C-208B u rrëzua 14 kilometra larg aeroportit që i shërbente Puerto Ayacucho-s, kryeqytetit të shtetit Amazonas në Venezuelën jugore. Midis pasagjerëve të tij ishin edhe njerëzit indigjenë Yanomami.
Sipas ushtrisë, avioni po “mbante anëtarë të komunitetit Yanomami në fshatin Parima B”, në skajin lindor të Amazonës, shumë afër kufirit me Brazilin. Qeveria njoftoi se bashkëpiloti dhe gjashtë persona të tjerë u vranë në rrëzim. Kapiteni i aeroplanit është midis të mbijetuarve.
Cessna i përkiste një njësie të forcave ajrore që ka mbështetur popullsinë indigjene në rajon. Një tjetër C-208B nga e njëjta njësi u rrëzua në nëntor 2022 gjatë një fluturimi stërvitor, duke vrarë pesë oficerë.
