Jennifer Abbott, një regjisore britanike fituese çmimesh, e njohur profesionalisht si Sarah Steinberg, u gjet e vrarë në banesën e saj në Camden të Londrës të premten në mbrëmje, e mbështjellë me një batanije në shtrat dhe me shirit ngjitës në gojë. Dyshohet se ajo ishte shënjestruar për orën e saj Rolex me diamant, e cila mungonte nga vendi i ngjarjes.
Trupi i saj u zbulua nga mbesa dhe fqinjët, të cilët hynë me forcë në banesë pasi nuk kishin më kontakt me të për katër ditë. Autopsia konfirmoi se zonja Abbott kishte humbur jetën si pasojë e traumave të shkaktuara nga goditje me mjete të forta.
Policia britanike ka nisur një hetim për vrasje dhe është në kërkim të informacioneve që mund të çojnë në kapjen e autorit. Deri tani nuk janë bërë arrestime.
Fqinjët treguan se Abbott kishte shprehur frikë për sigurinë e saj, pasi përdorues të drogës mblidheshin pranë hyrjes së apartamentit dhe ajo kishte pasur përplasje me ta vetëm pak ditë para vrasjes. Një javë më parë, ajo kishte shpërthyer në lot përpara një shoqeje, duke i rrëfyer se nuk ndihej e sigurt as për të fjetur.
Një tjetër detaj prekës: qeni i saj, i quajtur Princ, u gjet i mbyllur në banjo dhe kishte mbijetuar pas tre ditësh izolimi.
Abbott kishte një karrierë të pasur artistike. Ajo ishte shpërngulur nga Arizona në SHBA për të ndjekur shkollën në Londër, më pas kishte jetuar në Los Angeles, ku ishte fotografuar me figura të njohura si Paris Hilton dhe Kate Hudson. Ajo ishte vlerësuar për dokumentarin “Gods of War”.
Fqinjët e përshkruajnë si një grua inteligjente, të gjallë dhe shumë të sjellshme. Sipas një prej tyre, ajo kishte qenë së fundmi e diagnostikuar me kancer në stomak dhe i ishte nënshtruar një ndërhyrjeje të vështirë.
