Një tjetër ngjarje tragjike ka tronditur vendin.
Një tjetër i ri ka vendosur që t’i japë fund jetës në mënyrë tragjike. Bëhet fjalë për 20-vjeçarin e identifikuar si Hysen Lato, i cili është gjetur i vetëvarur në fshatin Gjonomadh në Korçë. Kanë qenë banorët e fshatit ata të cilët e kanë gjetur trupin e të riut të varur në pemë.
E teksa familjarët prej ditësh po e kërkonin, 20-vjeçari dyshohet se në gjendje të rënduar psikologjike i ka dhënë fund jetës.
Kujtojmë se përgjatë ditëve të fundit në vendin tonë janë regjistruar disa vetëvrasje. Jo më larg se disa ditë më parë, më 7 qershor, i riu Guido Dervishllari vendosi që të priste ëndrrat e tij në mes, duke u vetëvarur.
Ngjarjet e fundit që kanë përfshirë të rinj të cilët i kanë dhënë fund jetës së tyre në mënyrë tragjike janë një thirrje e fortë për ndërgjegjësim shoqëror. Brenda pak ditësh, kemi humbur jetë të reja, të cilat ndoshta ndiheshin të pashpresa, të vetmuara apo të pa dëgjuara. Kjo nuk është thjesht një statistikë, por një alarm që duhet të na zgjojë të gjithëve, familjarë, shoqëri, institucione dhe media.
Shëndeti mendor është po aq i rëndësishëm sa ai fizik, dhe duhet të trajtohet me seriozitetin e duhur. Ndaj, le të jemi më të kujdesshëm, më të vëmendshëm, dhe më të gatshëm për të qenë pranë atyre që kanë më shumë nevojë për ne.
