Pas ndalimit nga marina izraelite, aktivistët që udhëtonin me një jaht ndihmash drejt Gazës, mes tyre Greta Thunberg, janë dërguar në aeroportin Ben Gurion për t’u deportuar. Lajmi u konfirmua nga autoritetet izraelite, të cilat e cilësuan lundrimin një “jaht për selfie”.
Ministria e Jashtme e Izraelit njoftoi se ata që nuk pranojnë të firmosin dokumentet e deportimit do të përballen me gjykatën. Anija, e nisur nga Italia më 1 qershor, kishte në bord qytetarë nga disa vende evropiane dhe përfaqësues nga Parlamenti Evropian e media ndërkombëtare. Organizatorët e misionit thanë se qëllimi ishte ndërgjegjësimi për krizën humanitare në Gaza.
Izraeli e konsideron bllokadën ndaj Gazës si një masë sigurie për të ndaluar furnizimin e Hamasit me armë.
