Të gjithë sytë janë drejt Tiranës, ku Shqipëria dhe Serbia do të përballen në një sfidë vendimtare për kualifikimin në Kupën e Botës. E ndërsa emocioni po rritet në çdo cep ku ka shqiptarë, në Prishtinë po përgatitet një atmosferë e veçantë për të ndjekur këtë ndeshje historike.
Komuna e Prishtinës, në bashkëpunim me Drejtorinë për Sport, do të vendosë një ekran të madh në sheshin “Zahir Pajaziti”, duke krijuar një pikë grumbullimi për të gjithë tifozët kuqezi që duan të ndajnë emocionet e kësaj përballjeje.
Nën ngjyrat e flamurit dhe zërin e një zemre të përbashkët, Prishtina do të pulsojë me ritmin e një ndeshjeje që ka më shumë se vetëm sport në sfond. Shqipëria në fushë, gjithë shqiptaria në një zemër!
