7 Qershor 2025 — Ushqimi që konsumojmë çdo ditë mund të jetë burim shëndeti, por edhe rreziku i padukshëm që e kërcënon atë. Sot, në Ditën Botërore të Sigurisë Ushqimore, Organizata Botërore e Shëndetësisë (OBSH) dhe Organizata e Kombeve të Bashkuara për Ushqimin dhe Bujqësinë (FAO) sjellin në vëmendje rëndësinë jetike të sigurisë ushqimore me temën: “Siguria ushqimore: shkenca në veprim.”
Çfarë është siguria ushqimore dhe pse ka rëndësi?
Çdo vit, mbi 600 milionë njerëz në botë preken nga ushqimi i kontaminuar, një realitet që, përtej statistikave, përkthehet në pasoja serioze për shëndetin publik dhe ekonomitë familjare.
Siguria ushqimore nënkupton të kesh akses në ushqim që është jo vetëm i mjaftueshëm, por i pastër, i kontrolluar dhe pa substanca të rrezikshme, nga bakteret dhe viruset, te kimikatet e padeklaruara apo trajtimet e dëmshme teknologjike.
“Shkenca në veprim”: Mbrojtja nis në laborator
Tema e këtij viti thekson rolin e shkencës si aleat kyç në identifikimin dhe menaxhimin e rreziqeve ushqimore. Teknologjia, analizat mikrobiologjike dhe kontrollet rigoroze janë baza për vendime që ruajnë sigurinë në çdo hallkë të zinxhirit ushqimor: nga ferma, në fabrikë, në tavolinë.
Sipas OBSH-së, vendimmarrjet e bazuara në prova shkencore jo vetëm që parandalojnë shpërthimet e sëmundjeve ushqimore, por ndihmojnë edhe në përmirësimin e politikave publike për një të ardhme më të shëndetshme.
Shqipëria dhe sfidat e saj në sigurinë ushqimore
Në vendin tonë, temat e sigurisë ushqimore shpesh bëhen pjesë e debatit publik vetëm pas skandaleve që përfshijnë produkte të dyshimta ose mungesë transparence mbi përbërjen.
