Një situatë alarmante ka ngritur në këmbë qytetin e Gramshit, ku dhjetëra fëmijë të një kopshti shtetëror dyshohet se janë helmuar nga ushqimi i ofruar nga një kompani private kateringu.
Drejtoresha e Spitalit të Gramshit ka konfirmuar se njëri nga fëmijët është paraqitur fillimisht në urgjencë me simptoma të rënda, ndërsa raste të tjera kanë vijuar më pas. Sipas analizave të para, të paktën një rast është konfirmuar zyrtarisht me helmim nga salmonela bakter që shkakton infeksione të rrezikshme, sidomos tek fëmijët e vegjël.
Pavarësisht se situata aktualisht paraqitet “nën kontroll” dhe shumica e fëmijëve janë jashtë rrezikut, shqetësimi i prindërve nuk është zbutur. Ata kanë paralajmëruar një protestë në fillim të javës përpara ambienteve të kopshtit, duke kërkuar transparencë, hetim të thelluar dhe ndëshkim të përgjegjësve. Frika kryesore e tyre është që rasti mund të mbulohet, ndërsa shëndeti i fëmijëve të mbetet në hije.
Autoritetet kanë nisur hetimet dhe janë në pritje të rezultateve të plota laboratorike, por për shumë prindër, përgjigjet deri tani janë të pakta dhe të vonuara. Skandali ka nxitur debate të ashpra mbi cilësinë dhe kontrollin e shërbimeve ushqimore të ofruara nga subjektet private në institucionet publike.
