Kur isha e vogël luaja me shoqet duke imituar historitë në përralla, e çuditërisht gjithmonë kërkoja me ngulm rolin e princeshës…!
Jo për veshjet, as kurorën, e shumëçka plot shkëlqim që e rrethonte personazhin e saj, por për faktin se ajo kishte “princin e kaltër”. I cili nënkupton ndër të tjera djalin e pashëm, të zgjuar, të fortë dhe shumë xhentil.
Kur kuptova që jeta është më tepër se një përrallë, nisa të mos pres më për “princin e kaltër”, sepse të gjitha cilësitë e atij princi ishin relative. Që çfarë është e bukur për mua, nuk është për dikë tjetër. Nuk ka një princ të kaltër, por ka një djalë që të bën ta duash ashtu siç është, edhe nëse nuk është i palestruar e që ndonjëherë t’i e zbret më kollaj valixhen nga sipër dollapit.
Por që brenda teje e di që kimia me të është unike, që dashuria është kryefjala dhe jo lista e cilësive që ka.
Ja që “princi i kaltër” nuk ekziston, ose të paktën lista e cilësive të tij. Sepse princi im mund të mos jetë yti dhe e anasjella. Dashuria e bën dikë “princ” dhe një marrëdhënie e shëndetshme e bën “ të kaltër” si qielli i pafund historinë tuaj. Ndaj vajza flakini tutje listat e cilësive të mashkullit që duhet të jetë i denjë për ndjenjat tuaja. Sepse mund të rrezikoni të largoni njeriun që mund të ju bëjë të lumtur, vetëm pse në pamje të parë nuk përmbush standarde e listës suaj.
Dashurinë nuk e zgjedhim, na zgjedh!
Burimi: Donne.co
