Në një intervistë për gazetën spanjolle “El Mundo” gjatë vizitës së tij në Madrid, Kryeministri Edi Rama shpjegoi vendimin e qeverisë shqiptare për mbylljen e TikTok në Shqipëri. Rama theksoi se arsyeja kryesore është se platforma është “toksike për fëmijët” dhe se 95% e prindërve në Shqipëri janë të shqetësuar dhe të tmerruar për ndikimin që ka TikTok mbi të rinjtë.
Rama konfirmoi se pezullimi i platformës do të bëhet brenda disa ditësh, dhe se qeveria është angazhuar në një dialog konstruktiv me përfaqësuesit e TikTok për të siguruar që platforma të përmbushë kërkesat e autoriteteve shqiptare për të mbrojtur fëmijët dhe adoleshentët. Ai gjithashtu shtoi se platforma mund të riaktivizohet vetëm kur të plotësojë të gjitha standardet dhe kërkesat e vendosura nga shteti shqiptar.
Ky vendim ka shkaktuar diskutime të mëdha, por Rama është i bindur se ai është një hap i nevojshëm për të siguruar sigurinë e fëmijëve në Shqipëri.
