Një ngjarje e rëndë dhe e pazakontë ka ndodhur në shkollën “17 Shkurti” në fshatin Shirok, në Suharekë, ku një qen pitbull ka hyrë në ambientet e shkollës dhe ka sulmuar disa nxënës dhe zyrtarë policorë. Sipas informacionit të dhënë nga policia, incidenti ka ndodhur më 22 janar 2025, rreth orës 09:50 minuta, kur qeni ka arritur të hyjë brenda objektit të shkollës dhe ka shkaktuar lëndime tek disa individë.
Në momentin e sulmit, disa nxënës dhe zyrtarë policorë kanë marrë lëndime të ndryshme, ndërkohë që është ndërhyrë menjëherë për të menaxhuar situatën. Policia ka nisur hetimet dhe ka dhënë detaje të mëtejshme rreth ngjarjes. Ky incident ka shkaktuar shqetësim të madh tek komuniteti dhe ka ngritur pyetje rreth sigurisë në shkolla dhe menaxhimit të situatave të tilla.
“Patrullat policore i janë përgjigjur rastit me urgjencë, ku kanë arritur në shkollë. Kanë vërejtur një qen brenda shkollës, i cili kishte sulmuar nxënësit e shkollës dhe paraqiste rrezik potencial ende. Qeni ka sulmuar edhe policët, mirëpo në shpejtësi është asgjësuar, duke e mënjanuar rrezikun e mëtutjeshëm.” – ka thënë zëdhënësi i Policisë në Prizren, Vesel Gashi.
