Në një intervistë për “A Times”, sulmuesi i kombëtares shqiptare, Myrto Uzuni ka kërkuar publikisht një mundësi nga trajneri Silvinjo për kombëtaren shqiptare.
“Në Ligën e Kombeve na mungoi fati. Ukraina dy herë goditi portën në 9 minuta dhe pësuam dy gola. Për pjesën taktike, pastaj, flet trajneri më mirë”.
“Penalltia? Në futboll nuk ka rëndësi se kush e fiton penalltinë. Pra, nuk është e thënë se ai që e fiton do ta gjuajë. Te Granada jam unë ai që i gjuaj penalltitë dhe në ato momente unë kisha besimin për ta goditur, sepse jam edhe sulmues. Bajrami kishte besim te vetja e tij dhe unë i urova që ta shënote”.
I pyetur për rolin e tij në formacionin kuqezi, Uzuni u shpreh:
“Me kombëtaren, me trajnerin Silvinjo asnjëherë nuk jam provuar si sulmues, përjashto miqësoret dhe minutat me Ukrainën. Gjithmonë kam luajtur si anësor. Kam tri vite që te Granada luaj si qendërsulmues”.
