Gjykata ka caktuar masën e sigurisë “Arrest me burg”, për 14-vjeçarin Mario Perlleshaj, i cili i mori jetën Martin Canit. I mituri ndodhej në një spital privat pas plagëve që mori gjatë sherrit ku mbeti i vdekur bashkëmoshatari, aty ku mësoi edhe masën që u dha ndaj tij.
I mituri nuk është treguar bashkëpunues duke thënë se nuk mbante mend çfarë ka ndodhur ndërsa nuk ka treguar as se ku e ka fshehur thikën, armën e krimit.
Ndaj të miturit është ngritur nga Prokuroria akuza e vrasjes në rrethana cilësuese. Ndërkohë Policia e kishte referuar për akuzën e vrasjes me dashje 14-vjeçarin. Gjithashtu ndaj të miturit rëndon edhe akuza e mbajtje pa leje të armëve të ftohta.
Grupi hetimor është rikthyer ditën e djeshme në vendngjarje dhe ka sekuestruar kamerat e sigurisë në zonë, ku dyshohet se autori është larguar me vrap me shokët dhe kushërinjtë e tij. Kamerat janë sekuestruar pasi dyshohet se ka pasur persona të tjerë që kanë marrë autorin dhe e kanë larguar nga vendngjarja.
Ngjarja e rëndë ndodhi të hënën e 18 nëntorit 2024 në pranë shkollës 9-vjeçare ‘Fan Noli’ ku viktima dhe autori janë nxënës dhe sherri dyshohet se nisi për një sharje banale mes tyre.
