“Një qytet shqiptar, i famshëm për emërimin e rrugëve sipas shteteve dhe personaliteteve të botës ka deklaruara Presidentin e sapozgjedhur të SHBA-ve, Donald Trump, qytetar nderi”. Kështu nis shkrimin “Associated Press”, i cili po flet pikërisht për zonën e Kamzës. Artikulli u botua edhe nga “DailyMail”.
Bashkia e Kamzës votoi unanimisht për Trump-in duke e konsideruar atë si një “model revolucionar të rendit të ri demokratik, një ekspert ekonomik, një negociator në politikat e jashtme, një komunikues mendjemprehtë popullor dhe një udhëheqës të kohëve moderne”.
Media ndërkombëtare tregon se kryebashkiaku Xhelal Mziu postoi në “Facebook” një foto me Donald Trump-in, ku të dy ngrenë gishtat në shenjë fitoreje.
Anëtarët e Këshillit Bashkiak të Kamzës votuan dje pro projektvendimit për ta shpallur qytetar nderi presidentin e zgjedhur të SHBA-ve. Në arsyetimin për këtë vendim, ata renditën disa motive që përfshijnë politikën konservatore të Trump-it, dhe sepse siç e konsideron Bashkia e Kamzës, “është i vetmi president që gëzon respektin e botës me një përvojë të mjaftueshme në fushën e ekonomisë, duke hequr dorë nga paga e tij si president për ta venë në dispozicion të njerëzve në nevojë.”
“Donald Trump, pasqyron më të mirën, atë të “vlerave të New Yorkut”, dhe ofron shpresën më të mirë për të gjithë amerikanët, të cilët me të drejtë ndihen të tradhtuar nga e gjithë klasa politike”, shkruhet në motivimin e Bashkisë së Kamzës.
Burimi: Daily Mail
