Gjendja në të cilën ndodhet Kanye West është më e keqe se sa frikësoheshim, sipas raportimeve të reja. Pavarësisht se fillimisht u raportua se vuante nga një krizë nervore e përkohshme për shkak të mungesës së gjumit dhe dehidratimit, TMZ raporton se problemet e reperit janë më të thella.
Burime pranë familjes së tij, pohuan se mjekët kanë konstatuar probleme shumë më të thella se kaq. 39-vjeçari do ta kalojë në spital Festën e Falënderimeve, nën kujdesin e mjekëve dhe me bashkëshorten Kim Kardashian në krah. Për gjendjen e tij duket se është shqetësuar edhe Beyonce.
Ndonëse, në shpërthimin e tij të fundit, West sulmoi artisten dhe bashkëshortin e saj, Beyonce ka kuptuar se ai është në telashe të mëdha dhe ka nxitur Jay-Z-n që të rregullojë marrëdhëniet me të.
Dyshja e reperëve, dikur të pandarë, janë larguar së fundmi nga njëri-tjetri për arsye të panjohura, vetë West nuk ka ngurruar ta pranojë këtë publikisht. Burime pranë çiftit thonë se këngëtarja i ka kërkuar bashkëshortit që ta lërë pas të shkuarën dhe t’i gjendet pranë mikut të tij në këtë periudhë të vështirë.
Mendohet që faktor në përkeqësimin e gjendjes së reperit është edhe afrimi i përvjetorit të nënës së tij, e cila ndërroi jetë në 2007-n, si pasojë e komplikimeve gjatë një operacioni plastik. Thuhet se Kanye nuk ka arritur ende ta tejkalojë dhembjen që i shkaktoi një ngjarje e tillë.
Burimi: Daily Mail
