Aktivistja e njohur Vilma Dule ka reaguar në lidhje me tentativën e 45 vjeçarit në Korçë, Bledar Trëndafili, për të djegur me benzinë bashkëshorten e tij, Melisa Trëndafili. Përmes disa postimeve me video në InstaStory, Dule shprehet se nëse dhuna ndaj gruas trajtohet si një problem që duhet mbajtur brenda katër mureve, situata do të qëndrojë e njëjtë.
Deklarata e Vilma Dule:
Si një person që e ka provuar vetë djegien, do të thoja vetëm se nuk ka gjë më të tmerrshme, më të dhimbshme dhe më sfilitese për shpirtin sepse ti i ndjen të gjitha dhimbjet. E thënë kjo, çdo ditë në Shqipëri, është bërë tashmë kronikë, e vrau, e plagosi, e dogji…
Nuk do të ketë asnjëherë një fund ne qoftë se dhuna ndaj gruas nuk trajtohet si një problem shoqëror, shtetëror dhe kulturor. Në qoftë se ne, vazhdojmë të konsiderojmë dhunën ndaj gruas si një problem midis çiftit, si një problem që do kalojë me kohën, si një problem që do kalojë kur të lindin fëmijët… Si një problem që do kalojë kur ai të lërë bixhozin, alkoolin, kur ai të gjejë punën…
Për aq kohë sa ne vazhdojmë ta trajtojmë dhunën ndaj gruas si një problem që duhet ta mbajmë brenda katër mureve, në këtë situatë do jemi. Për aq kohë sa dhuna ndaj gruas nuk ndëshkohet, ose ndëshkohet shumë vonë kur ajo tashmë nuk jeton më, nuk do të ketë asnjëherë parandalim. Ajo çka duhet në Shqipëri është parandalimi, duhen strukturat. Duhet që viktimat të kenë besim tek sistemi!
@iconstyle.mediaRikujtojmë që Vilma 11 vite më parë u sulmua me acid në Tiranë, një ngjarje ende e pazbardhur…♬ original sound – ICONSTYLE
Ngjarja e Vilma Dules ndodhi në vitin 2013, kur ajo u sulmua me acid në fytyrë. Sulmi ndodhi poshtë pallatit ku banonte Vilma, ku agresori e kishte pritur derisa të dilte.
