Një zjarr ka shpërthyer në shtëpinë historike Somerset në Londër ditën e sotme. Sipas CNN, më shumë se 100 zjarrfikës ndodhen në vendngjarje. Nga çatia e ndërtesës mund të shihet tymi që ngrihet mbi Londrën qendrore. Zjarrfikësit po punojnë nga një vinç për të shuar zjarrin.
Ndërtesa dikur ishte shtëpia e Marinës Mbretërore, por tani përdoret si qendër kulturore. Drejtori i Somerset House Trust, Jonathan Reekie, i tha medias britanike PA se zjarri shpërtheu në krahun perëndimor të ndërtesës, ku ndodhen zyrat dhe objektet e pasme të shtëpisë.
Nuk ka “vepra arti në atë zonë”, tha Reekie.
Rreth 125 zjarrfikës dhe 20 makina zjarrfikëse janë vendosur në Somerset House, sipas Brigadës së Zjarrfikësve të Londrës. Ekuipazhet janë duke luftuar me flakët të cilat kanë përfshirë një pjesë të çatisë së ndërtesës, tha brigada e zjarrfikësve në një deklaratë.
Shkaku i zjarrit nuk dihet ende, thuhet në deklaratë, dhe Somerset House është mbyllur për publikun ndërsa zjarri është duke u shuar.
Kompleksi u ndërtua për herë të parë në vitet 1500, megjithëse u shkatërrua dhe u rindërtua në vitet 1700.
Shtëpia e ka marrë emrin e saj nga Edward Seymour, Duka i Somerset, i cili e ndërtoi atë si një pallat për veten e tij në 1547. Duka u ekzekutua në Kullën e Londrës disa vjet më vonë dhe pronësia e pallatit të tij i kaloi Kurorës.
Në 1604, Traktati i Londrës u nënshkrua brenda ndërtesës, duke i dhënë fund Luftës 19-vjeçare Anglo-Spanjolle. Më vonë shërbeu si selia e ushtrisë parlamentare gjatë Luftës Civile Angleze dhe mezi i shpëtoi djegies në Zjarrin e Madh të Londrës në 1666.
Somerset House tani është mikpritës i ngjarjeve dhe ekspozitave krijuese. Është shtëpia e Galerisë Cortauld, e cila numëron vepra të Manet, Van Gogh dhe Monet midis atyre në koleksionin e saj.
