Greqia kërkon ndihmë ndërkombëtare për përballimin e situatës së zjarreve që po i afrohen periferisë në Athinë dhe Italia, Franca, Rumania dhe Republika Çeke i janë përgjigjur.
Një helikopter super Puma pritet të mbërrijë nesër nga Franca, ndërsa një avion Canadair do të vijë nga Italia së bashku me 75 zjarrfikës dhe 25 makina që do të vijnë nga Republika çeke. Në ndihmë pritet të shkojnë edhe nga Spanja e Turqia.
Mijëra persona që jetojnë përreth Athinës janë evakuuar përfshirë edhe nga qyteze historike Maraton, pasi një zjarr i madh i është afruar kryeqytetit grek favorizuar edhe nga era. Autoritetet kanë urdhëruar të paktën edhe pesë komunitete të tjera që të evakuohen dhe dy spital në verilindje të Athinës. Gjithashtu është urdhëruar evakuimi i banorëve nga tetë fshatra, përfshirë nga Maraton, të dielën e 11 gushtit.
Dëmet janë të mëdha. Janë djegur dhjetëra shtëpi dhe makina, ndërsa shkatërrimi ekologjik është vërtet i pallogaritshëm, pasi mijëra hektarë pyje me pisha janë bërë hi. Zjarrefikësit janë përqëndruar në dy fronte, në Kallitechnoupoli dhe Grammatiko, në veri, ndërsa situata është përmirësuar në Varnavas dhe Dionysos, shkruan cnn grek.
Mbi 670 zjarrfikës, 27 grupe me punonjës të pyjeve, 183 makina dhe 32 mjete fluturuese vijojnë prej 20 orësh luftën me zjarret.
“Do të vijojmë deri kur të kemi shuar dhe vatrën e fundit’ theksoi ministri i Krizave Klimatike dhe Mbrojtjes Civile Vasilis Kikilias. Tashmë janë evakuar banorët në Drafi, Dioni, Dasamari si dhe ata të Pentelit dhe Nea Pentelit dhe Kallitechnoupoli.
Situata mbetet shqetësuese për shkak se në orët në vijim pritet shtim i erës, çka do të vështirësojë punën e zjarrfikësve.
